Category: Stocks

ഒരു നല്ല മ്യൂച്വൽ ഫണ്ട് എങ്ങനെ തിരഞ്ഞെടുക്കാം?

വിപണിയിൽ ഇപ്പോൾ നൂറുകണക്കിന് മ്യൂച്ചൽ ഫണ്ടുകൾ ലഭ്യമാണ്. ഇവയിൽ നിന്നു നല്ലത് തെരഞ്ഞെടുക്കാൻ വളരെ ബുദ്ധിമുട്ടാണ്. ഈ തെരഞ്ഞെടുപ്പിനു വേണ്ടി ഉപയോഗിക്കാവുന്ന ചില മാനദണ്ഡങ്ങൾ ആണ് ഞാൻ താഴെ പറയുന്നത്.

  1. ഹ്രസ്വകാല പ്രകടനം അവഗണിച്ച് ദീർഘകാല പ്രകടനത്തിൽ ശ്രദ്ധ കേന്ദ്രീകരിക്കുക
  2. എക്സ്പെൻസ് റേഷ്യോ (Expense Ratio) ശ്രദ്ധിക്കുക
  3. NAV’ക്ക് പ്രാധാന്യം കൊടുക്കേണ്ട കാര്യമില്ല
  4. മ്യൂച്വൽ ഫണ്ട് ബെഞ്ച്മാർക്ക് സൂചികയോട് താരതമ്യപ്പെടുത്തി പ്രകടനം ശ്രദ്ധിക്കുക
  5. രണ്ട് മ്യൂച്വൽ ഫണ്ടുകൾ താരതമ്യം ചെയ്യുമ്പോൾ അവ സമാനമാണെന്ന് ഉറപ്പാക്കുക
  6. പ്രമേയം അടിസ്ഥാനമാക്കിയുള്ള (Theme Based) മ്യൂച്വൽ ഫണ്ടുകൾ വാങ്ങരുത്

ഹ്രസ്വകാല പ്രകടനം അവഗണിച്ച് ദീർഘകാല പ്രകടനത്തിൽ ശ്രദ്ധ കേന്ദ്രീകരിക്കുക

മ്യൂച്ചൽ ഫണ്ടുകൾ ദീർഘകാല നിക്ഷേപങ്ങളാണ്. കഴിഞ്ഞ ഒന്നു രണ്ടു കൊല്ലത്തെ പ്രകടനത്തെക്കാൾ കഴിഞ്ഞ പത്തു കൊല്ലത്തെ പ്രകടനമാണ് കണക്കിൽ എടുക്കേണ്ടത്. ചില ഫണ്ടുകൾ മാർക്കറ്റ് വളർച്ചയുടെ കാലത്ത് വൻ വളർച്ചയും എന്നാൽ മാർക്കറ്റ് ഇടിയുന്ന സമയത്ത് വൻ തകർച്ചയും കാണിക്കും. എന്നാൽ നല്ല മ്യൂച്ചൽ ഫണ്ടുകൾ വളർച്ചയുടെ കാലത്ത് മാർക്കറ്റ് സൂചികയേക്കാൾ നന്നായി വളരുകയും മാർക്കറ്റ് തകരുമ്പോൾ സൂചികയേക്കാൾ കുറഞ്ഞ അളവിൽ താഴോട്ട് വരികയും ചെയ്യുകയുള്ളൂ. അപ്പോൾ കഴിഞ്ഞ ഒന്നോ രണ്ടോ കൊല്ലത്തെ പ്രകടനം മാത്രം നോക്കിയാൽ മാർക്കറ്റ് ഇടിയുമ്പോൾ ഭയങ്കരമായി തകർന്നു പോകുന്ന ഫണ്ടുകൾ നമുക്കു തിരിച്ചറിയാൻ സാധിക്കുകയില്ല. അതു കൊണ്ട് പത്തു കൊല്ലത്തെ വളർച്ച നിരക്കാണ് മ്യൂച്ചൽ ഫണ്ട് താരതമ്യം ചെയ്യുമ്പോൾ ഉപയോഗിക്കാൻ പറ്റിയ അളവുകോൽ.

എക്സ്പെൻസ്  റേഷ്യോ (Expense Ratio) ശ്രദ്ധിക്കുക

ഫണ്ട് നടത്താൻ വേണ്ടി നമ്മൾ കമ്പനിക്ക് കൊടുക്കുന്ന ഫീസാണ് എക്സ്പെൻസ് റേഷ്യോ (Expense Ratio). ഒരേ വരുമാനം തരുന്ന രണ്ടു ഫണ്ടുകൾ തമ്മിൽ താരതമ്യം ചെയ്യുമ്പോൾ എക്സ്പെൻസ് റേഷ്യോ കുറവുള്ള ഫണ്ട് തെരഞ്ഞെടുക്കുക. കാരണം ഫീസ് കുറച്ചു മാത്രം കൊടുക്കുന്നത് എപ്പോഴും നല്ലതാണല്ലോ. എക്സ്പെൻസ് റേഷ്യോയിലെ വ്യത്യാസം വളരെ ചെറുതാണെങ്കിലും നിക്ഷേപങ്ങൾ വളരുമ്പോൾ ഈ വ്യത്യാസം വളരെ വലിയ തുകയായി മാറും. ഇതുകൊണ്ട് ഒരേ പോലെയുള്ള രണ്ടു ഫണ്ടുകൾ തമ്മിൽ താരതമ്യം ചെയ്യുമ്പോൾ എക്സ്പെൻസ് റേഷ്യോ ഏറ്റവും കുറവുള്ള ഫണ്ട് തിരഞ്ഞെടുക്കുക.

ഒരു മ്യൂച്ചൽ ഫണ്ടിൻ്റെ ഒരു യൂണിറ്റിൻ്റെ വിലയാണ് നെറ്റ് അസെറ്റ് വാല്യൂ (Net Asset Value) അഥവാ NAV. മ്യൂച്ചൽ ഫണ്ടിൻ്റെ കയ്യിലുള്ള ഓഹരികളുടെയും മറ്റു നിക്ഷേപങ്ങളുടെയും വിലയ്ക്കനുസരിച്ച് NAV കൂടുകയും കുറയുകയും ചെയ്യും. 1,000 രൂപ നിക്ഷേപിച്ചാൽ 500 രൂപ NAV ഉള്ള ഫണ്ടിൽ 2 യൂണിറ്റ് മാത്രമേ ലഭിക്കൂ. എന്നാൽ NAV 10 രൂപയാണെങ്കിൽ 1,000 രൂപയ്ക്ക് 100 യൂണിറ്റ് ലഭിക്കും. ഇത് NAV കുറവുള്ള ഫണ്ട് വാങ്ങിയാൽ കൂടുതൽ മെച്ചം ഉണ്ടാകും എന്നുള്ള ഒരു തോന്നൽ ഉണ്ടാക്കാറുണ്ട്. പക്ഷേ മ്യൂച്ചൽ ഫണ്ട് വാങ്ങുമ്പോൾ NAV ക്ക് യാതൊരു പ്രാധാന്യവും ഇല്ല. കാരണം ഒരു ഫണ്ട് തുടങ്ങുമ്പോൾ NAV 10 രൂപയാണെങ്കിൽ 10 കൊല്ലം കഴിയുമ്പോഴേക്കും അത് ചിലപ്പോൾ 50 – 60 രൂപ ആയിട്ടുണ്ടാകും. കാരണം ഒരു ഫണ്ട് കുറേക്കാലം പ്രവർത്തിക്കുമ്പോൾ അതിലെ നിക്ഷേപങ്ങളുടെയും ഓഹരികളുടെയും വില കൂടും. അതിനനുസരിച്ച് NAV’യും കൂടും. 10 രൂപ NAV ഉള്ള ഫണ്ട് 10% വളർന്നാലും 500 രൂപ NAV ഉള്ള ഫണ്ട് 10% വളർന്നാലും നമ്മൾ നിക്ഷേപിക്കുന്ന തുക 10% മാത്രമേ വളരുകയുള്ളൂ. എന്നു വെച്ചാൽ 1,000 രൂപ നിക്ഷേപിച്ചിട്ടു ഫണ്ട് 10% വളർന്നാൽ 100 രൂപ മാത്രമേ നമുക്ക് നേട്ടമുള്ളൂ. 100 യൂണിറ്റ് 10% വളർന്നോ അതോ 2 യൂണിറ്റ് 10% വളർന്നോ എന്നുള്ളത് നമ്മുടെ നിക്ഷേപത്തിൻ്റെ വളർച്ചയെ ബാധിക്കുന്നില്ല. അക്കൗണ്ടിൽ എത്ര യൂണിറ്റ് ഉണ്ട് എന്നുള്ളതല്ല അക്കൗണ്ടിൽ എത്ര തുക ഉണ്ട് എന്നുള്ളതാണ് പ്രധാനം.

മ്യൂച്വൽ ഫണ്ട് ബെഞ്ച്മാർക്ക് സൂചികയോട് താരതമ്യപ്പെടുത്തി പ്രകടനം ശ്രദ്ധിക്കുക

ഒരു മ്യൂച്ചൽ ഫ്രണ്ട് അതിലെ നിക്ഷേപങ്ങൾക്ക് നല്ല വളർച്ച തരുന്നുണ്ടോ എന്ന് അറിയുവാൻ മ്യൂച്ചൽ ഫണ്ട് ബെഞ്ച് മാർക്ക് സൂചികയും (Bench Mark Index) ആയി താരതമ്യം ചെയ്തു നോക്കണം. ഉദാഹരണത്തിന്, വൻകിട കമ്പനികളിൽ മാത്രം നിക്ഷേപിക്കുന്ന ഒരു മ്യൂച്ചൽഫണ്ട് ആണ്  HDFC Top 100 Fund.  ഇതിൻ്റെ ബെഞ്ച്മാർക്ക് ആയി സ്വീകരിച്ചിരിക്കുന്നത് NIFTY 100 സൂചിക ആണ്. ഈ ഫണ്ട് നല്ല രീതിയിൽ പ്രവർത്തിക്കുന്നുണ്ടോ എന്ന് അറിയുവാനുള്ള ഏറ്റവും നല്ല മാർഗ്ഗം കഴിഞ്ഞ 10 കൊല്ലത്തെയോ 15 കൊല്ലത്തെയോ വളർച്ചാനിരക്ക് NIFTY 100 സൂചികയെക്കാൾ കൂടുതൽ ഉണ്ടോ എന്ന് നോക്കുന്നതാണ്. ഇത് കണ്ടു പിടിക്കാൻ വളരെ എളുപ്പമാണ്. ഗൂഗിൾ സെർച്ച് (Google Serch) ചെയ്തു നോക്കിയാൽ മതി.

രണ്ട് മ്യൂച്വൽ ഫണ്ടുകൾ താരതമ്യം ചെയ്യുമ്പോൾ അവ സമാനമാണെന്ന് ഉറപ്പാക്കുക

രണ്ട് മ്യൂച്ചൽ ഫണ്ടുകൾ തമ്മിൽ താരതമ്യം ചെയ്യുമ്പോൾ അവ ഒരേ പോലെയുള്ള നിക്ഷേപങ്ങൾ നടത്തുന്നതാണ് എന്ന് ഉറപ്പുവരുത്തണം. വൻകിട കമ്പനികളിൽ (large cap) നിക്ഷേപിക്കുന്ന മ്യൂച്ചൽ ഫണ്ട് ചെറിയ കമ്പനികളിൽ (mid cap) നിക്ഷേപിക്കുന്ന മ്യൂച്വൽ ഫണ്ടുകളും ആയി താരതമ്യം ചെയ്തിട്ട് കാര്യമില്ല. അതേ പോലെ തന്നെ റിയൽ എസ്റ്റേറ്റ് സെക്ടറിൽ നിക്ഷേപിക്കുന്ന ഫണ്ടും ബാങ്കിങ്ങ് സെക്ടറിൽ നിക്ഷേപിക്കുന്ന ഫണ്ടും തമ്മിൽ താരതമ്യം ചെയ്തിട്ട് കാര്യമില്ല. മ്യൂച്വൽ ഫണ്ടുകളുടെ ഒബ്ജക്ടീവ് (objective) വായിച്ചു നോക്കിയാൽ അറിയാം അവ ഏത് തരം നിക്ഷേപങ്ങളാണ് നടത്താൻ ഉദ്ദേശിക്കുന്നതെന്ന്. അതേ പോലെ തന്നെ മ്യൂച്ചൽ ഫണ്ടുകൾ ഒരേ ബെഞ്ച്മാർക്ക് സൂചിക  (benchmark index) ആണ് പിന്തുടരുന്നത് എങ്കിൽ അതിൽ നിന്നും നമുക്ക് മനസ്സിലാക്കാം അവ ഒരേ പോലെയുള്ള ഫണ്ടുകൾ ആണെന്ന്.

പ്രമേയം അടിസ്ഥാനമാക്കിയുള്ള (Theme Based) മ്യൂച്വൽ ഫണ്ടുകൾ വാങ്ങരുത്

ഒരു പ്രമേയത്തെ അടിസ്ഥാനമാക്കി(Theme Based) നിക്ഷേപിക്കുന്ന ഫണ്ടുകൾക്ക് ആണ് ഇന്ന് പരസ്യങ്ങൾ കൂടുതലായി നടത്തുന്നത്. ഉദാഹരണത്തിന്, റിയൽ എസ്റ്റേറ്റ്(real estate) മേഖലയിൽ മാത്രം നിക്ഷേപിക്കുന്ന ഫണ്ടുകൾ അല്ലെങ്കിൽ ഫാർമ(pharma) മേഖലയിൽ മാത്രം നിക്ഷേപിക്കുന്ന ഫണ്ടുകൾ അല്ലെങ്കിൽ ബാങ്കിംഗ്(Banking) സെക്ടറുകളിൽ മാത്രം നിക്ഷേപിക്കുന്ന ഫണ്ടുകൾ. ഇത്തരം ഫണ്ടുകൾ വാങ്ങാതെ ഇരിക്കുന്നതാണ് നല്ലത്. നമ്മൾ മ്യൂച്ചൽ ഫണ്ട് വാങ്ങുന്നതിൻ്റെ ഒരു ലക്ഷ്യം വിപണിയിലെ പല കമ്പനികളിൽ നിക്ഷേപിക്കുന്നത് കൊണ്ട് ലഭിക്കുന്ന വൈവിധ്യമാണ്. ഒരു മേഖലയിൽ മാത്രം നിക്ഷേപിക്കുന്ന ഫണ്ട് ഈ വൈവിധ്യം നമുക്ക് തരുന്നില്ല. ഉദാഹരണത്തിന്, റിയൽ എസ്റ്റേറ്റ് മേഖലയിൽ മാത്രം നിക്ഷേപിക്കുന്ന ഒരു ഫണ്ട് എടുക്കാം. റിയൽ എസ്റ്റേറ്റ് മേഖലയ്ക്ക് ഒരു ക്ഷീണം സംഭവിച്ചാൽ പിന്നെ ഈ ഫണ്ട് ലാഭം തരാൻ ഒരു പാട് കാലം എടുക്കും. എന്നാൽ പല മേഖലകളിൽ നിക്ഷേപിക്കുന്ന ഫണ്ട് ആണെങ്കിൽ റിയൽ എസ്റ്റേറ്റ് മേഖലയിലെ കമ്പനികൾക്ക് വരുന്ന നഷ്ടം മറ്റു മേഖലയിലെ കമ്പനികൾ കുറച്ചെങ്കിലും നികത്തും. അതു കൊണ്ട് ഫണ്ട് പെട്ടെന്ന് നമുക്ക് ലാഭം തരും.

മുന്നറിയിപ്പ്: മ്യൂച്വൽ ഫണ്ട് നിക്ഷേപങ്ങൾ  മാർക്കറ്റ് റിസ്കുകള്ക്ക് വിധേയമാണ്, സ്കീം സംബന്ധിച്ചുള്ള എല്ലാ രേഖകളും ശ്രദ്ധാപൂർവ്വം വായിക്കുക. ഓഹരി വിപണി നിക്ഷേപങ്ങൾ നഷ്ടസാധ്യത ഉള്ളവ ആണ്. നിക്ഷേപിക്കുന്നതിനു മുൻപ് വിശദമായി പഠിക്കണം. കഴിഞ്ഞ കാല  പ്രകടനം ഭാവി വരുമാനം സൂചിപ്പിക്കുന്നത് അല്ല. ഒരു പുത്തൻ നിക്ഷേപം തെരഞ്ഞെടുക്കുന്നതിന് മുൻപ് നിങ്ങളുടെ നിർദ്ദിഷ്ട നിക്ഷേപ ആവശ്യകതകൾ പരിഗണിക്കുക.






അടുത്ത ലേഖനം: ഓഹരി വിപണി തകർന്നു. അക്കൗണ്ടിലെ ബാലൻസ് പകുതി ആയി. ഇനി എന്ത് ചെയ്യും?

ഓഹരി വിപണിയിലെ നിക്ഷേപകരും ചൂതാട്ടക്കാരും

ഓഹരി നിക്ഷേപങ്ങൾക്ക്  മറ്റ് നിക്ഷേപങ്ങളെ അപേക്ഷിച്ച് ഒരു പ്രത്യേകതയുണ്ട്. ഓഹരികൾ വാങ്ങുവാനും വിൽക്കുവാനും വളരെ എളുപ്പമാണ്. ഒരു ഡീമാറ്റ് അക്കൗണ്ടും(Demat Account) ഇൻറർനെറ്റ് കണക്ഷനും(Internet Connection) ഉണ്ടെങ്കിൽ ഒരു മിനിറ്റിനുള്ളിൽ ഒരു ഓഹരി വാങ്ങുവാനും അത് മറിച്ചു വിൽക്കാനും കഴിയും. റിയൽ എസ്റ്റേറ്റ് നിക്ഷേപങ്ങളും ബാങ്ക് സ്ഥിര നിക്ഷേപങ്ങളും ഇൻഷുറൻസുമായി ബന്ധപ്പെടുത്തിയ നിക്ഷേപങ്ങളും സർക്കാർ ഉറപ്പു തരുന്ന നിക്ഷേപങ്ങളും ഒന്നും ഇങ്ങനെ എളുപ്പം വാങ്ങുവാനും മറിച്ചു വിൽക്കുവാനും സാധിക്കുകയില്ല. ബഹുഭൂരിപക്ഷം നിക്ഷേപ പദ്ധതികൾക്കും പെട്ടെന്ന് വിൽക്കുമ്പോൾ പിഴ കൊടുക്കേണ്ടി വരും. ഓഹരികൾക്ക് ഇങ്ങനെ ഒരു പിഴ ഇല്ലാത്ത കാരണം വാങ്ങി പെട്ടെന്ന് മറിച്ചു വിൽക്കുന്നവരുടെ എണ്ണം വളരെ കൂടുതലാണ്.

ഒരു ഓഹരി വാങ്ങി പെട്ടന്ന് മറിച്ചു വിൽക്കുന്നതിന് ഹ്രസ്വകാല(Short Term) നിക്ഷേപം  എന്നാണ് വിളിക്കുന്നത്. വാങ്ങിയ ദിവസം തന്നെ വിൽക്കാൻ ഉദ്ദേശിച്ചു വാങ്ങുന്ന ഓഹരി കച്ചവടത്തിനെ ഡേ ട്രേഡിങ്ങ്(Day Trading) എന്നും വിളിക്കും.

ഓഹരികളിൽ നിക്ഷേപിക്കുമ്പോൾ   മൂന്ന് കൊല്ലത്തിനു താഴ്ന്ന കാലാവധിക്കു വേണ്ടി നിക്ഷേപിക്കുന്നത് ലോട്ടറി ടിക്കറ്റ് എടുക്കുന്ന പോലെയുള്ള ഒരു ചൂതാട്ടമാണ്. മറ്റേതു ചൂതാട്ടം പോലെ ഒരു ദിവസം വിജയിച്ചാൽ അടുത്ത ദിവസം നമ്മൾ തോൽക്കും.

ഒരു ഓഹരി എന്നാൽ ഒരു കമ്പനിയുടെ ഒരു ചെറിയ ഉടമസ്ഥാവകാശമാണ്. കോടികൾ ആസ്തിയുള്ള കമ്പനിക്ക് ഒരു ദിവസം കൊണ്ട് വലിയ മാറ്റം ഒന്നും സംഭവിക്കുകയില്ല. വലിയ കമ്പനികളിൽ ജോലി ചെയ്തിട്ടുള്ളവരോട് ചോദിച്ചാൽ അറിയാം ഒരു വലിയ കമ്പനിയിൽ ഒരു വലിയ മാറ്റം സംഭവിക്കണമെങ്കിൽ വർഷങ്ങളെടുക്കും. രാവിലെ വാങ്ങി വൈകുന്നേരത്തിനു മുൻപ് മറിച്ചു വിൽക്കാൻ ഉദ്ദേശിക്കുന്നവർ രാവിലെ വാങ്ങിയതിലും ഉയർന്ന വില വേറൊരാൾ തരാൻ തയ്യാറാകും എന്ന പ്രതീക്ഷയിലാണ് വാങ്ങുന്നത്. അപ്പോൾ ഇത് നിക്ഷേപം അല്ല ഒരു തോന്നലിൻ്റെ പുറത്ത് ചെയ്യുന്ന ചൂതാട്ടം ആണ്. 

ഓഹരി വിപണിയിൽ നിന്ന് അതിശയിപ്പിക്കുന്ന നേട്ടങ്ങൾ ഉണ്ടാക്കാൻ സാധിക്കും. പക്ഷേ ഈ നേട്ടങ്ങളെല്ലാം കിട്ടുന്നത് ഓഹരി വിപണിയിൽ ദിവസേന കച്ചവടം ചെയ്യുന്ന ഡേ ട്രേഡേഴ്‌സിന് അല്ല. ഓഹരി വിപണിയിൽ നിന്ന് വലിയ സമ്പത്ത് ഉണ്ടാക്കിയ വാരൻ ബഫറ്റ്(Warren Buffett), രാകേഷ് ജുൻജുൻവാല(Rakesh Jhunjhunwala) എന്നിവരൊക്കെ ദീർഘകാലത്തേക്ക് നിക്ഷേപിക്കുന്നവരാണ്. ഓഹരി വിപണിയിൽ നിന്ന് ഇന്ന് ലാഭമുണ്ടാക്കി സമ്പന്നനായവരുടെ പട്ടികയെടുത്താൽ ആദ്യത്തെ 100 പേരിൽ ഒരാൾ പോലും ഡേ ട്രേഡിങ്ങ് നടത്തുന്ന ആളുണ്ടാവില്ല.

ദീർഘകാല നിക്ഷേപത്തിൻ്റെ നേട്ടം മനസ്സിലാക്കുവാൻ വേണ്ടി ഏയ്ചേർ മോട്ടോഴ്സ്(Eicher Motors Ltd) എന്ന കമ്പനിയുടെ ഓഹരി ഉദാഹരണം എടുക്കാം. ഇന്ത്യൻ വിപണിയിൽ ഏറ്റവും നേട്ടം തന്ന കമ്പനികളിൽ ഒന്നാണ് ഇത്. റോയൽ എൻഫീൽഡ് ബൈക്കുകൾ നിർമിക്കുന്ന കമ്പനിയാണ് ഇത്. ജനുവരി 4 2010’ൽ ഈ കമ്പനിയുടെ ഓഹരിക്ക് 650 രൂപ ആയിരുന്നു വില. പത്തു കൊല്ലം കഴിഞ്ഞ് ജനുവരി 2 2020’ൽ ഈ ഓഹരിക്ക് 22,000 രൂപയാണ് വില. പത്തു വർഷം കൊണ്ട് 33 ഇരട്ടിയായി വില. ഇതിനു പുറമേ ഒരു ഓഹരിക്ക് 535 രൂപ ഡിവിഡൻഡും(dividend) കിട്ടി. ഒരു ലക്ഷം രൂപ നിക്ഷേപിച്ചിരുന്നു എങ്കിൽ ഇതിൽ പത്ത് വർഷം കൊണ്ട് 33.5 ലക്ഷം രൂപയായി വളർന്നേനെ. 

എന്നാൽ ഈ ഓഹരിയിൽ ഡേ ട്രേഡിങ്ങ് നടത്തിയ ഒരാൾക്ക് ഈ നേട്ടം ഉണ്ടാക്കാൻ വളരെ ബുദ്ധിമുട്ടാണ്. കാരണം ഇന്ന് രാവിലെ 1,000 രൂപയ്ക്ക് വാങ്ങി വൈകിട്ട് 1,500 രൂപയ്ക്ക് വിറ്റാൽ നാളെ ഇതേ ഓഹരി 2,000 രൂപയ്ക്ക് പിന്നെയും വാങ്ങാൻ മനസ്സ് സമ്മതിക്കുമോ എന്നുള്ളത് ഒരു കാര്യം. ഈ പത്തു കൊല്ലത്തിനിടക്ക് ഓഹരി വില ഇടിഞ്ഞ ദിവസങ്ങളിൽ വൻ നഷ്ടങ്ങൾ സംഭവിക്കുകയും ചെയ്യും. ഇനി ഈ പത്തു കൊല്ലത്തിനിടക്ക് എല്ലാ ദിവസവും ഡേ ട്രേഡിങ്ങ് നടത്താൻ പറയണമെന്നില്ലല്ലോ. അങ്ങനെ മാർക്കറ്റിൽ ഇല്ലാതിരുന്ന ഒരു ദിവസമാണ് ഓഹരി ഇരുപതോ മുപ്പതോ ശതമാനം മുന്നോട്ടു കുതിക്കുന്നത് എങ്കിൽ ആ നേട്ടം നമുക്ക് എന്നെന്നേക്കുമായി നഷ്ടമായി. ഇതിനു പുറമേ ഡിവിഡെൻറ്(dividend) വരുമാനം ലഭിക്കുകയും ഇല്ല. ഇതു കൊണ്ടാണ് ഓഹരി വിപണിയിൽ നീണ്ട കാലാവധിക്ക് നിക്ഷേപിക്കുന്നവരെ നിക്ഷേപകർ എന്നും ചെറിയ കാലയളവിൽ നിക്ഷേപിക്കുന്നവരെ ചൂതാട്ടക്കാർ എന്നും ഞാൻ വിളിച്ചത്. 

ഡീമാറ്റ് അക്കൗണ്ട് നടത്തുന്ന എല്ലാ ബ്രോക്കർമാരും കമ്പനികളും ഹ്രസ്വകാല നിക്ഷേപകരെയും ഡേ ട്രേഡേഴ്സിനെയും ആണ് കൂടുതൽ പ്രോത്സാഹിപ്പിക്കുന്നത്. കാരണം അവർക്ക് പണം കിട്ടുന്നത് ഓഹരി വാങ്ങുമ്പോഴും വിൽക്കുമ്പോഴും ഉള്ള കമ്മീഷൻ ആയിട്ടാണ്. അഞ്ചോ പത്തോ കൊല്ലത്തിലൊരിക്കൽ മാത്രം വാങ്ങുകയും ഒരിക്കൽ മാത്രം വിൽക്കുകയും ചെയ്താൽ അവർക്ക് വലിയ ലാഭം ഇല്ലല്ലോ. എന്നാൽ ദിവസേന രണ്ടു മൂന്നു തവണ വാങ്ങി വിൽക്കുന്ന ഒരാളുടെ കയ്യിൽ നിന്ന് ഒരുപാട് പണം ഫീസായി കിട്ടുകയും ചെയ്യും. ഇത് പ്രോത്സാഹിപ്പിക്കാനായി ദിവസേന വാങ്ങി വിൽക്കുന്നവർക്ക് മാർജിൻ(margin) സൗകര്യങ്ങളും ഇവർ നൽകും.എന്നു വച്ചാൽ ഓഹരി വാങ്ങാൻ പണം കടം കൊടുക്കും. ഓഹരി ദിവസേന വാങ്ങി വിൽക്കുന്നത് ചൂതാട്ടം ആണെങ്കിൽ മാർജിനിൽ ദിവസേന വാങ്ങി വിൽക്കുന്നത് വീടിൻ്റെ ആധാരം പണയം വെച്ച് ലോട്ടറി എടുക്കുന്നത് പോലെയാണ്. കൂടുതൽ അറിയാൻ ഈ ലേഖനം വായിക്കുക : മാർജിൻ ട്രേഡിംഗ് – ഓഹരി വ്യാപാരത്തിലെ വാരിക്കുഴി

ഒരു കാര്യം കൂടി, ദീർഘ കാല നിക്ഷേപങ്ങളുടെ നേട്ടങ്ങൾക്ക് ഹ്രസ്വ കാല നിക്ഷേപങ്ങളുടെ നേട്ടങ്ങളെക്കാൾ നികുതി കുറവാണ്. അതുകൊണ്ട് ദീർഘകാലം നിക്ഷേപങ്ങളിൽ നിന്ന് കിട്ടുന്ന ലാഭം വലുതാണെന്ന് മാത്രമല്ല നികുതി കുറച്ചു കൊടുത്താൽ മതി.






മുന്നറിയിപ്പ്: ഓഹരി വിപണി നിക്ഷേപം അപകടസാധ്യതയ്ക്ക് വിധേയമാണ്. നിക്ഷേപിക്കുന്നതിനു മുമ്പ് കമ്പനിയുടെ വിവരങ്ങളും അനുബന്ധ രേഖകളും വായിക്കുക. കഴിഞ്ഞ കാല  പ്രകടനം ഭാവി വരുമാനം സൂചിപ്പിക്കുന്നത് അല്ല. ഒരു പുത്തൻ നിക്ഷേപം തെരഞ്ഞെടുക്കുന്നതിന് മുൻപ് നിങ്ങളുടെ നിർദ്ദിഷ്ട നിക്ഷേപ ആവശ്യകതകൾ പരിഗണിക്കുക.

അടുത്ത ലേഖനം: മാർജിൻ ട്രേഡിംഗ് – ഓഹരി വ്യാപാരത്തിലെ വാരിക്കുഴി

മാർജിൻ ട്രേഡിംഗ് – ഓഹരി വ്യാപാരത്തിലെ വാരിക്കുഴി

ഓഹരി വിപണി വഴി സമ്പന്നരായവർ ഒരുപാടുണ്ട്. ഇവരിൽ ബഹുഭൂരിപക്ഷവും ദീർഘകാല അടിസ്ഥാനത്തിൽ നിക്ഷേപിക്കുന്നവരാണ്. എന്നു വെച്ചാൽ ഒരു ഓഹരി വാങ്ങി മൂന്നു കൊല്ലത്തിനു മുകളിൽ സമയം കഴിഞ്ഞ് മാത്രം വിൽക്കുന്ന ആൾക്കാർ. 

ഇതേ പോലെ തന്നെ ഓഹരി വിപണി വഴി സമ്പത്ത് മുഴുവൻ നഷ്ടമായ ആൾക്കാരും ഒരുപാടുണ്ട്. ഇവരിൽ ബഹു ഭൂരിപക്ഷവും ഹ്രസ്വകാല നിക്ഷേപകർ അഥവാ ഷോർട്ട് ടേം(short term) ട്രേഡേഴ്സ് ആണ്. വാങ്ങി ഒരു കൊല്ലത്തിനുള്ളിൽ വിൽക്കുന്നതിന് ആണ് ഹ്രസ്വകാല ട്രേഡിങ് എന്ന് പറയുന്നത്. ഇതിൽ ഭൂരിപക്ഷം പേരും ഡേ ട്രേഡേഴ്സ് (day traders) ആണ് എന്ന് വെച്ചാൽ ഒരു ദിവസത്തിനുള്ളിൽ വാങ്ങി വിൽക്കുന്നവർ. 

നിങ്ങൾ ഓഹരി വ്യാപാരം തുടങ്ങിയതേ ഉള്ളെങ്കിൽ മുഴുവൻ സമ്പത്തും എങ്ങനെ ഓഹരിയിൽ നശിച്ചു പോകും എന്ന സംശയം ന്യായമായും തോന്നാം. ഒരു ലക്ഷം രൂപ ആസ്തിയുള്ള ഒരാൾ 1,000 രൂപ എടുത്ത് ഓഹരി വാങ്ങിയാൽ ഏറ്റവും കൂടിയാൽ 1,000 രൂപ അല്ലേ നഷ്ടം വരുകയുള്ളൂ. അപ്പോൾ മുഴുവൻ സമ്പാദ്യം നശിച്ചു പോകും എന്ന് പറഞ്ഞാൽ എങ്ങനെ ശരിയാകും? ഇവിടെയാണ് ഓഹരി വ്യാപാരത്തിലെ ഏറ്റവും വലിയ ചതിക്കുഴി ആയ മാർജിൻ ട്രേഡിങ് (margin trading) കടന്നു വരുന്നത്.

ചുരുക്കിപ്പറഞ്ഞാൽ, ഡീമാറ്റ് അക്കൗണ്ട് നടത്തുന്ന ബ്രോക്കറുടെ കയ്യിൽ നിന്ന് പണം കടം വാങ്ങി ട്രേഡിങ് നടത്തുന്നതിനെയാണ് മാർജിൻ ട്രേഡിങ് എന്നു പറയുന്നത്. ഒരു ഉദാഹരണത്തിന്, നമ്മുടെ അക്കൗണ്ടിൽ മൊത്തം ബാലൻസ് 10,000 രൂപ ഉണ്ടെന്നു വയ്ക്കുക. ബ്രോക്കർ 10% മാർജിൻ ആണ് ആവശ്യപ്പെടുന്നതെങ്കിൽ നമ്മൾക്ക് ഒരു ലക്ഷം രൂപയുടെ ട്രേഡിങ് നടത്താൻ സാധിക്കും, കാരണം ഒരു ലക്ഷം രൂപയുടെ 10% ആയ 10,000 രൂപ നമ്മുടെ അക്കൗണ്ടിൽ ഉണ്ടല്ലോ. എന്നു വെച്ചാൽ നമുക്ക് ഒരു ലക്ഷം രൂപയുടെ ഓഹരി വാങ്ങാൻ സാധിക്കും. ബ്രോക്കറുടെ നിയമങ്ങളനുസരിച്ച് ഇത്ര  ദിവസത്തിനുള്ളിൽ ഈ പണം തിരിച്ചു കൊടുക്കുകയോ അല്ലെങ്കിൽ നമ്മൾ വാങ്ങിയ ഓഹരി വിറ്റ് പണം തിരിച്ച് അടയ്ക്കുകയോ വേണം. 

എല്ലാ ബ്രോക്കർമാരും മാർജിൻ ട്രേഡിങ് പ്രോത്സാഹിപ്പിക്കും. കാരണം അവർക്ക് പലതാണ് നേട്ടം. 10,000 രൂപയ്ക്ക് ഓഹരി വാങ്ങുമ്പോൾ 100 രൂപയാണ് ഫീസ് കിട്ടുന്നതെങ്കിൽ ഒരു ലക്ഷം രൂപയ്ക്ക് ഓഹരി വാങ്ങിയാൽ 1,000 രൂപ ഫീസ് കിട്ടുമല്ലോ. അതേ പോലെ തന്നെ ഒരു ലക്ഷം രൂപയ്ക്ക് ഓഹരി വാങ്ങുമ്പോൾ നമ്മൾ 90,000 രൂപ കടം വാങ്ങുകയാണ് ചെയ്യുന്നത്. ഇതിന് പലിശ എന്തെങ്കിലും പേരിൽ അവർ ഈടാക്കും. അതു കൊണ്ട് എല്ലാ കമ്പനികളും മാർജിൻ ട്രേഡിങ് വളരെയധികം പ്രോത്സാഹിപ്പിക്കും.

ഇനി നമ്മുടെ ഉപഭോക്താവിൻ്റെ കാര്യം നോക്കാം. 10,000 രൂപയുടെ ഈട് വെച്ച് ഒരു ലക്ഷം രൂപയുടെ ഓഹരി വാങ്ങുമ്പോൾ 90,000 രൂപ ബാങ്കിൽ നിന്ന് കടം എടുക്കുക ആണ്. ഓഹരിയുടെ വില കൂടിയാലും കുറഞ്ഞാലും 90,000 രൂപ നമ്മൾ തിരിച്ചടച്ചേ പറ്റൂ. കണക്കു കൂട്ടാൻ എളുപ്പത്തിന് 1,000 രൂപയുടെ 100 ഓഹരിയാണ് ഒരു ലക്ഷം രൂപയ്ക്ക് വാങ്ങിയത് എന്ന് വിചാരിക്കുക*. ബാങ്ക് ഒരാഴ്ചയ്ക്കുള്ളിൽ കാശ് അടക്കണം എന്നാണ് പറഞ്ഞിരിക്കുന്നത്. ഒരാഴ്ച കൊണ്ട് ഓഹരി വില കൂടി 1,200 ആയാൽ ലാഭം =(1200-1000)×100= 20,000 രൂപ. 

ഇനി ഒരാഴ്ച കൊണ്ട് വില കുറഞ്ഞ് 800 ആയിരുന്നെങ്കിൽ, നഷ്ടം = (1000-800)×100 = 20,000.  അപ്പോൾ അക്കൗണ്ടിൽ വെറും 10,000 രൂപ ഉണ്ടായിരുന്ന ആൾ 20,000 രൂപയുടെ നഷ്ടം വരുത്തി വെച്ചു. പതിനായിരം രൂപയ്ക്കു പകരം ഒരു ലക്ഷം രൂപയ്ക്കാണ് മാർജിൻ ട്രേഡിങ് തുടങ്ങിയിരുന്നെങ്കിൽ നഷ്ടം രണ്ടു ലക്ഷം ആയിരുന്നേനെ.

മിക്കവാറും എല്ലാവരും ഓഹരി വ്യാപാരം തുടങ്ങുന്നത് കൂട്ടുകാരും ബന്ധുക്കളും ഓഹരിയിൽ നിന്ന് പണമുണ്ടാക്കിയ കഥ കേൾക്കുമ്പോഴാണ്. ഓഹരി വിപണിയിൽ പൊതുവേ വർഷങ്ങളോളം നീണ്ടു നിൽക്കുന്ന വളർച്ചയുടെ കാലങ്ങളും(Bull Market) പിന്നെ കുറച്ചുകാലം നീണ്ടു നിൽക്കുന്ന തളർച്ചയുടെ കാലങ്ങളും(Bear Market) ആണ് പൊതുവെ സംഭവിക്കാറ്. മിക്കവാറും ആൾക്കാർ കാശുണ്ടാക്കിയ കഥകൾ കേൾക്കുന്നത് വിപണി വളർച്ചയുടെ കാലയളവിൻ്റെ നടുക്ക് ആയിരിക്കും. അപ്പോൾ വിപണിയിൽ വ്യാപാരം തുടങ്ങുമ്പോൾ വളർച്ചയുടെ കാലമാണെങ്കിൽ ആദ്യത്തെ കുറെ വ്യാപാരങ്ങളിൽ നേട്ടമുണ്ടാകും. അങ്ങനെ നേട്ടം കിട്ടുമ്പോൾ 10,000  രൂപയ്ക്ക് വാങ്ങി 2,000 രൂപയുടെ ലാഭമുണ്ടാക്കുന്ന അതേ സമയത്ത് മാർജിൻ ട്രേഡിങ് ഉപയോഗിച്ച് 20,000 രൂപയുടെ ലാഭം ഉണ്ടാക്കാമായിരുന്നല്ലോ എന്നു തോന്നും. അങ്ങനെയാണ് ഭൂരിഭാഗം ആൾക്കാരും മാർജിൻ ട്രേഡിങ്ങിൽ എത്തിപ്പെടുന്നത്. അങ്ങനെ 10,000 രൂപ വളർത്തി ഒരു ലക്ഷം രൂപയും രണ്ടു ലക്ഷം രൂപയും ആകും. അക്കൗണ്ടിലുള്ള മുഴുവൻ തുകയും ഉപയോഗിച്ച് മാർജിൻ ട്രേഡ് നടത്തി കൊണ്ടിരിക്കുന്നതിനിടയിൽ ആയിരിക്കും മാർക്കറ്റ് തകർച്ച തുടങ്ങുന്നത്. മുഴുവൻ മാർജിൻ ഉപയോഗിച്ച് ട്രേഡിങ് നടത്തി കൊണ്ടിരിക്കുമ്പോഴാണ് മാർക്കറ്റ് തകരുതുന്നതെങ്കിൽ ആദ്യത്തെ ദിവസം തന്നെ അക്കൗണ്ട് കാലിയാകും. മിക്കവാറും പണം തിരിച്ചു ബാങ്കിന് കൊടുക്കേണ്ട അവസ്ഥയും വരും. ഇങ്ങനെയാണ് ബഹുഭൂരിപക്ഷം ആൾക്കാരും ഓഹരി വിപണി വഴി കയ്യിലുള്ള സ്വത്ത് മൊത്തം നശിപ്പിക്കുന്നത്.

ഇങ്ങനെ സംഭവിക്കാതിരിക്കാൻ ചില സജ്ജീകരണങ്ങൾ ചെയ്യാം. ഉദാഹരണത്തിന്, 10% വില കുറഞ്ഞാൽ ഉടനെ ഓഹരി വിറ്റ് നഷ്ടം നിയന്ത്രിക്കാൻ ഉള്ള നിർദേശം നൽകാൻ സാധിക്കും. പക്ഷേ അക്കൗണ്ടിൽ ഉള്ള തുകയുടെ പല ഇരട്ടി തുകക്ക് മാർജിൻ ട്രേഡിങ്ങ് നടത്തുമ്പോൾ ഈ നഷ്ടവും വലുതാണ്. ഒറ്റ അടിക്കു മുഴുവൻ തുകയും പോകുന്നതിനു പകരം പലപ്പോഴയായി പോകും എന്നെ ഉള്ളൂ.

സാധാരണ നിക്ഷേപകർ മാർജിൻ ട്രേഡിങ് നടത്താതെ ഇരിക്കുന്നതാണ് നല്ലത്. കിട്ടുന്ന ലാഭം വലുതാണെങ്കിലും നഷ്ടത്തിനുള്ള സാധ്യത അതിഭീകരമാണ്.

*മുകളിലെ കണക്കുകളിൽ ഫീസും നികുതിയും മനസിലാകാൻ എളുപ്പത്തിന് വേണ്ടി മനപൂർവം ഒഴിവാക്കിയതാണ്.






മുന്നറിയിപ്പ്: ഓഹരി വിപണി നിക്ഷേപം അപകടസാധ്യതയ്ക്ക് വിധേയമാണ്. നിക്ഷേപിക്കുന്നതിനു മുമ്പ് കമ്പനിയുടെ വിവരങ്ങളും അനുബന്ധ രേഖകളും വായിക്കുക. കഴിഞ്ഞ കാല  പ്രകടനം ഭാവി വരുമാനം സൂചിപ്പിക്കുന്നത് അല്ല. ഒരു പുത്തൻ നിക്ഷേപം തെരഞ്ഞെടുക്കുന്നതിന് മുൻപ് നിങ്ങളുടെ നിർദ്ദിഷ്ട നിക്ഷേപ ആവശ്യകതകൾ പരിഗണിക്കുക.

അടുത്ത ലേഖനം: രണ്ട് ഓഹരികളുടെ കഥ

ഓഹരി വിപണി തകർന്നു. അക്കൗണ്ടിലെ ബാലൻസ് പകുതി ആയി. ഇനി എന്ത് ചെയ്യും?

തിരക്കിലായിരുന്ന കുറച്ചു ദിവസങ്ങൾക്കു ശേഷം ഇന്നാണ് ഞാൻ എൻ്റെ ഒരു മ്യൂച്ചൽ ഫണ്ട് അക്കൗണ്ടിൻ്റെ ബാലൻസ്  പരിശോധിച്ചത്. അവസാനം നോക്കിയപ്പോൾ 3.5 ലക്ഷത്തിന് മുകളിൽ ബാലൻസ് ഉണ്ടായിരുന്ന അക്കൗണ്ടിൽ ഇപ്പോൾ 2.2 ലക്ഷം മാത്രമേ ബാലൻസ് കാണിക്കുന്നുള്ളൂ.   രണ്ടു മൂന്നാഴ്ച കൊണ്ട് ഏകദേശം 1.3 ലക്ഷം രൂപ നഷ്ടം. 37.14 % നഷ്ടം.

ഈ അക്കൗണ്ടിൽ ഞാൻ നിക്ഷേപങ്ങൾ നിർത്തിയിട്ട് ഒന്ന് രണ്ട് കൊല്ലമായി. തുടർച്ചയായി നിക്ഷേപം നടത്തിയിരുന്ന അക്കൗണ്ട് ആയിരുന്നെങ്കിൽ നഷ്ടത്തിൻ്റെ ശതമാനം ഇനിയും കൂടിയേനെ.

ഓഹരി വിപണിയിൽ മ്യൂച്ചൽ ഫണ്ടായോ അല്ലെങ്കിൽ നേരിട്ട് ഓഹരികൾ ആയിട്ടോ നിക്ഷേപം നടത്തിയ എല്ലാവരുടെയും അക്കൗണ്ട് ബാലൻസിൻ്റെ അവസ്ഥ ഇത് തന്നെ ആവാനാണ് സാധ്യത. ആദ്യമായാണ് ഇത്തരമൊരു തകർച്ച നേരിടുന്നതെങ്കിൽ, ഇപ്പോൾ ഉള്ള നഷ്ടം സഹിച്ച് കൂടുതൽ നഷ്ടം വരാതിരിക്കാൻ വേണ്ടി കൈയിലുള്ളതെല്ലാം വിറ്റു ബാങ്കിൽ സ്ഥിര നിക്ഷേപമാക്കിയാലോ (Fixed Deposit) എന്നു തോന്നാം.  സ്ഥിര നിക്ഷേപങ്ങൾ ഒരിക്കലും ഇട്ട തുകയിൽ കുറയുന്നത് കാണേണ്ടി വരില്ലല്ലോ. പക്ഷെ ഇപ്പോൾ വിറ്റാൽ അത് വൻ മണ്ടത്തരം ആകും.

ഇപ്പോഴത്തെ ഈ ഓഹരി വിപണി തകർച്ച കൊറോണ വൈറസ് കാരണമാണ്. ഇത് എത്ര കാലം നീണ്ടു നിൽക്കും എന്നോ വിപണി ഇനിയും എത്രയധികം താഴോട്ടു പോകും എന്നോ നമുക്ക് പ്രവചിക്കാൻ സാധിക്കുകയില്ല. പക്ഷേ ഒരു കാര്യം പ്രവചിക്കാൻ സാധിക്കും, വിപണി ഇനിയും പഴയ നിരക്കുകളേക്കാൾ മുകളിലേക്ക് ഉയരും. ഇത് ഒരു വർഷത്തിനുള്ളിൽ നടക്കുമോ, അതോ 2 വർഷം എടുക്കുമോ 5 വർഷം എടുക്കുമോ അതോ 10 വർഷം എടുക്കുമോ എന്നാണ് നമുക്ക് പറയാൻ പറ്റാത്തത്. ഇന്ത്യ എന്ന രാജ്യം കൊറോണ വൈറസ് ഭീഷണിയിൽ നിന്ന് രക്ഷപ്പെട്ടു മുന്നോട്ടു പുരോഗമിക്കും എന്ന കാര്യത്തിൽ ആർക്കും സംശയം ഉണ്ടാവാൻ സാധ്യതയില്ല. അങ്ങനെ സംഭവിക്കുമ്പോൾ ഓഹരി വിപണിയും പൂർവ്വാധികം ശക്തിയോടെ തിരിച്ചു വരും എന്ന കാര്യത്തിലും സംശയമില്ല.

അക്കൗണ്ടിലെ വൻ നഷ്ടങ്ങൾ കണ്ട് പേടിച്ച് ഇപ്പോൾ തന്നെ ഓഹരി വിറ്റാൽ, നിങ്ങൾ ചെയ്യുന്നത്  വില കൂടിയ അവസരങ്ങളിൽ വാങ്ങിയിട്ട് ഏറ്റവും വില കുറഞ്ഞ അവസ്ഥയിൽ വിൽക്കുന്ന മണ്ടത്തരം ആണ്. നാടോടുമ്പോള്‍ നടുവേ ഓടുന്നത് ഓഹരി വിപണി നിക്ഷേപകന് ചേർന്ന സ്വഭാവമല്ല.

ഈ സാഹചര്യത്തിൽ എന്ത് ചെയ്യും എന്ന് എല്ലാവർക്കും സംശയം തോന്നാം.  എന്ത് ചെയ്യണം, എന്ത് ചെയ്യരുത് എന്ന് ഞാൻ താഴെ പറയാം. 2008’ൽ ഇതു പോലെ ഒരു ഭീകരമായ ഓഹരി വിപണി തകർച്ചയിൽ പങ്കെടുത്തതിൻ്റെ അനുഭവത്തിൽ നിന്നാണ് ഞാൻ പറയുന്നത്.

ചെയ്യേണ്ട കാര്യങ്ങൾ

  1. നടത്തിക്കൊണ്ടിരിക്കുന്ന നിക്ഷേപങ്ങൾ തുടർന്ന് പോവുക.
  2. നിങ്ങളുടെ കയ്യിൽ ഉടനെ ആവശ്യമില്ലാത്ത പണം ഉണ്ടെങ്കിൽ നിങ്ങൾ നിക്ഷേപിക്കുന്ന തുക കൂട്ടുക. 
  3. എല്ലാ ദിവസവും അക്കൗണ്ട് ബാലൻസ് പരിശോധിച്ച് ബ്ലഡ് പ്രഷർ കൂട്ടാതെ ഇരിക്കുക.
  4. പണത്തിന് ആവശ്യം വന്നാൽ മറ്റ് നിക്ഷേപങ്ങൾ വിൽക്കാൻ ശ്രമിക്കുക. ഓഹരി വിപണി നിക്ഷേപങ്ങൾ വിൽക്കുവാൻ പറ്റിയ സമയമല്ല ഇത്.
  5. ഓഹരി വിപണിയിൽ പുതുതായി നിക്ഷേപം തുടങ്ങാൻ ഇതിലും നല്ല സമയം കിട്ടുവാൻ സാധ്യത കുറവാണ്. അതു കൊണ്ട് ഏതെങ്കിലും നല്ല മ്യൂച്ചൽ ഫണ്ടുകൾ നോക്കി നിക്ഷേപം തുടങ്ങാൻ ശ്രദ്ധിക്കുക. മ്യൂച്ചൽ ഫണ്ടുകളെ കുറിച്ച് കൂടുതൽ അറിയാൻ ഈ ലേഖനം വായിക്കുക.
  6. എല്ലാ മാസവും ഒരു നിശ്ചിത തുക നിക്ഷേപിക്കുന്ന എസ്.ഐ.പി (SIP or Systematic Investment Plan) മാർഗ്ഗമാണ് മ്യൂച്വൽ ഫണ്ടിൽ നിക്ഷേപിക്കാനുള്ള ഏറ്റവും നല്ല മാർഗ്ഗം. പക്ഷേ, ഒരു വലിയ തുക ഒറ്റയടിക്ക് നിക്ഷേപിക്കണം എന്നുണ്ടെങ്കിൽ ഓഹരികൾ വില കുറഞ്ഞിരിക്കുന്ന ഈ അവസരമാണ് അതിന് ഏറ്റവും നല്ലത്.

ചെയ്യരുതാത്ത കാര്യങ്ങൾ

  1. കൂടുതൽ നഷ്ടം വരാതിരിക്കാൻ വേണ്ടി നിലവിലുള്ള നിക്ഷേപങ്ങൾ വിൽക്കരുത്. 
  2. നടന്നു കൊണ്ടിരിക്കുന്ന എസ്.ഐ.പി’ൽ നിന്ന് പിൻവാങ്ങരുത്. ഇതു വരെ നിക്ഷേപിച്ചു കൊണ്ടിരുന്ന പോലെ തന്നെ തുടർച്ചയായി നിക്ഷേപിക്കണം. വിപണി ഉയർന്ന് നിൽക്കുമ്പോഴും താഴ്ന്ന് നിൽക്കുമ്പോഴും ഒരേ പോലെ നിക്ഷേപിക്കുന്നത് കൊണ്ടാണ് എസ്.ഐ.പി ‘ൽ നിന്നും ഉയർന്ന നേട്ടങ്ങൾ ഉണ്ടാകുന്നത്. അപ്പോൾ വില കുറഞ്ഞ സമയത്ത് നിക്ഷേപം നിർത്തിയാൽ നിങ്ങൾക്ക് നഷ്ടം സംഭവിക്കും.
  3. പണം പലിശക്ക് എടുത്തു ഓഹരിയിൽ നിക്ഷേപിക്കരുത്. വില കുറഞ്ഞ കാരണം പണം പലിശക്ക് എടുത്തത് ഓഹരിയിൽ നിക്ഷേപിച്ചു പെട്ടെന്ന് ലാഭം ഉണ്ടാക്കാം എന്ന് ചിന്തിക്കരുത്. കാരണം ഓഹരി വിപണി തിരിച്ചു കയറി വരാൻ എത്ര കാലം എടുക്കും എന്ന് ആർക്കും പ്രവചിക്കാനാവില്ല. അതേ പോലെ തന്നെ ഇനി എത്ര മാത്രം ഇടിയും എന്നും പ്രവചിക്കാനാവില്ല.
  4. വാങ്ങുന്ന കമ്പനികളെ കുറിച്ച് പൂർണമായ വിവരം ഇല്ലെങ്കിൽ ഒറ്റപ്പെട്ട ഓഹരികൾ വാങ്ങാതിരിക്കുക. ഓരോ വിപണി തകർച്ചയിലും ചില കമ്പനികൾ പൂർണമായി നശിച്ചു പോവാറുണ്ട് നിങ്ങൾ വാങ്ങുന്ന കമ്പനി പൂർണ്ണമായും നശിച്ചു പോയാൽ മുഴുവൻ തുകയും നഷ്ടം വരും.

ഇതു പോലത്തെ ഉയർച്ച താഴ്ചകൾ ഓഹരി നിക്ഷേപത്തിൻ്റെ ഭാഗമാണ്. ശാന്തമായിരിക്കുക. ക്ഷമയോടെ കുറച്ചു കാലം കാത്തിരിക്കുക.

മുന്നറിയിപ്പ്: മ്യൂച്വൽ ഫണ്ട് നിക്ഷേപങ്ങൾ  മാർക്കറ്റ് റിസ്കുകള്ക്ക് വിധേയമാണ്, സ്കീം സംബന്ധിച്ചുള്ള എല്ലാ രേഖകളും ശ്രദ്ധാപൂർവ്വം വായിക്കുക. ഓഹരി വിപണി നിക്ഷേപങ്ങൾ നഷ്ടസാധ്യത ഉള്ളവ ആണ്. നിക്ഷേപിക്കുന്നതിനു മുൻപ് വിശദമായി പഠിക്കണം. കഴിഞ്ഞ കാല  പ്രകടനം ഭാവി വരുമാനം സൂചിപ്പിക്കുന്നത് അല്ല. ഒരു പുത്തൻ നിക്ഷേപം തെരഞ്ഞെടുക്കുന്നതിന് മുൻപ് നിങ്ങളുടെ നിർദ്ദിഷ്ട നിക്ഷേപ ആവശ്യകതകൾ പരിഗണിക്കുക.






രണ്ട് ഓഹരികളുടെ കഥ

രണ്ട് ഓഹരികളുടെ കഥ

2009 മെയ് മാസം ഞാൻ വാങ്ങാൻ ശ്രമിച്ച രണ്ടു ഓഹരികളുടെ കഥയാണിത്.

ആദ്യത്തേത് മോസർ ബെയർ ഇന്ത്യ (Moser Baer (India) Ltd).  കോമ്പാക്ട് ഡിസ്ക്(Compact Disc) അഥവാ CD ഉപയോഗിച്ചിട്ടുള്ള എല്ലാവരും കേട്ടിരിക്കാൻ സാദ്ധ്യതയുള്ള ഒരു പേരാണ് ഇത്. മോസർ ബെയർ CD ഉണ്ടാക്കുന്ന കമ്പനിയായിരുന്നു. ഞാൻ സ്ഥിരമായി CD’കൾ വാങ്ങാറുള്ളത് കൊണ്ട് ഈ കമ്പനിയുടെ പേര് എനിക്ക് നല്ല പരിചിതമായിരുന്നു. അപ്പോഴാണ് മോസർ ബെയർ മലയാളം സിനിമകൾ CD’യിൽ റെക്കോർഡ് ചെയ്തു 10-15 രൂപക്ക്  വിൽക്കാൻ തുടങ്ങുന്നത്. ഇവ വളരെയധികം ജനപ്രിയമായിരുന്നു. ഇതിനും പുറമേ മോസർ ബെയർ കമ്പനി സോളാർ പാനൽ ബിസിനസ് തുടങ്ങാൻ പോകുന്നു എന്നും ഞാൻ വായിച്ചു. സോളാർ പാനൽ ഭാവിയുടെ ഊർജ്ജ ഉറവിടം ആണല്ലോ. പിന്നെ ഒന്നും നോക്കിയില്ല. എടുത്തു ചാടി 10,000 രൂപയ്ക്ക് ഓഹരി വാങ്ങാൻ ഓർഡർ ഇട്ടു. ഏകദേശം 90 രൂപയ്ക്കാണ് ഒരു ഓഹരി കിട്ടിയത്. 110 ഓഹരി കിട്ടി. കമ്പനിക്ക് കടം ഉണ്ടോ, നിലവിൽ കമ്പനി ലാഭത്തിൽ ആണോ എന്നൊന്നും  നോക്കാതെ ആണ് വാങ്ങിയത് എന്നു കൂടി ഓർക്കണം.

അടുത്ത കമ്പനി ശ്രദ്ധയിൽ പെട്ടത് പേജ് ഇൻഡസ്ട്രീസ്(Page Industries Ltd.) ആണ്. ICICI ബാങ്കിൻ്റെ ഡീമാറ്റ് അക്കൗണ്ട് ശാഖ ആയ ICICI Direct’ൽ നിന്നു വരുന്ന ഒരു ഇമെയിൽ വഴിയാണ് ഞാൻ ഈ കമ്പനിയെ കുറിച്ച് ആദ്യമായി കേൾക്കുന്നത്. ഈ കമ്പനിയാണ് ഇന്ത്യയിൽ ജോക്കി(Jockey) ബ്രാൻഡ് തുണി ഉൽപന്നങ്ങൾ വിൽക്കുന്നത്.  ഞാൻ ജോക്കിയുടെ ഒരു സ്ഥിരം ഉപഭോക്താവ് ആയിരുന്നു. ICICI Direct’ൻ്റെ അഭിപ്രായം പ്രകാരം ഈ കമ്പനി നല്ല സാഹചര്യത്തിലാണ് പ്രവർത്തിക്കുന്നത്. ഇനി ഒരുപാട് വളർച്ചയ്ക്കും സാധ്യതയുണ്ട്. ഇവരുടെ ഉൽപന്നങ്ങളുടെ ഗുണമേന്മ നേരിട്ട് അറിയാവുന്നതു കൊണ്ട് ഇതിൻ്റെ ഓഹരി വാങ്ങാനും ഞാൻ 10,000 രൂപയ്ക്ക് ഓർഡർ കൊടുത്തു. പക്ഷേ ഒരു മണ്ടത്തരം കാണിച്ചു. 401 രൂപയായിരുന്നു അപ്പോൾ ഓഹരിയുടെ വില. 25 എണ്ണം 400 രൂപയ്ക്ക് വാങ്ങാനാണ് ഞാൻ ഓർഡർ ഇട്ടത്. ഒരു ദിവസം മുകളിലേക്കും താഴേക്കും രണ്ടു മൂന്ന് രൂപ വില മാറുന്നത് സർവ്വ സാധാരണമാണ്. വിലകുറഞ്ഞ 400 ലെത്തുമ്പോൾ വാങ്ങാം അല്ലെങ്കിൽ അടുത്ത ദിവസം വാങ്ങാം എന്നു വിചാരിച്ചു. അന്ന് വില കുറഞ്ഞും ഇല്ല, പിന്നെ കുറെ ദിവസത്തേക്ക് എനിക്ക് അക്കൗണ്ടിൽ കയറാൻ സാധിച്ചുമില്ല. അതുകൊണ്ട് പേജ് ഇൻഡസ്ട്രീസ് ഇന്ത്യയുടെ ഓഹരി എൻ്റെ കയ്യിൽ ഇല്ല.

അതിനു ശേഷം എനിക്ക് വിദേശത്ത് പോയി ജോലി ചെയ്യാൻ അവസരം കിട്ടിയ കാരണം മൂന്നാല് വർഷങ്ങൾക്കു ശേഷമാണ് ഞാൻ പിന്നെ ഓഹരി വിപണി ശ്രദ്ധിക്കുന്നത്.

ഇന്ന് ജനുവരി 31 2019’ൽ മോസർ ബെയർ ഒരു ഓഹരിക്ക് 1 രൂപ 38 പൈസ. എൻ്റെ കയ്യിലുള്ള 110 ഓഹരിക്ക് വില 151 രൂപ 80 പൈസ.

ഇന്ന് ജനുവരി 31 2019’ൽ പേജ് ഇൻഡസ്ട്രീസ് ഒരു ഓഹരിക്ക് 25,195 രൂപയാണ് വില. 25 ഓഹരി ഉണ്ടായിരുന്നെങ്കിൽ 6,29,875 രൂപ.

പാഠം 1: ഓഹരി വിപണിയിൽ വൻ നഷ്ടങ്ങൾക്ക് സാധ്യതയുണ്ട്. നഷ്ടപ്പെട്ടാൽ വിഷമമില്ലാത്ത പണമേ ഓഹരികളിൽ നിക്ഷേപിക്കാവൂ.

പാഠം 2: ഓഹരി വിപണിയിൽ വൻ നേട്ടങ്ങൾക്ക് സാധ്യതയുണ്ട്.

പാഠം 3: ഒരു നിക്ഷേപം തിരഞ്ഞെടുത്താൽ പിന്നെ ഒന്നു രണ്ട് രൂപ ലാഭിക്കാൻ വേണ്ടി പിശുക്ക് കാണിക്കരുത്.

എല്ലാ വശങ്ങളും ശ്രദ്ധിച്ചു ഓഹരി വാങ്ങാൻ എല്ലാവർക്കും സാധിക്കില്ല. അതു കൊണ്ടാണ് മ്യൂച്ചൽ ഫണ്ടുകൾ സാധാരണക്കാരന് ഏറ്റവും യോജിച്ച ഓഹരി വിപണി നിക്ഷേപ മാർഗ്ഗം ആയി മാറുന്നത്. കുറച്ചു തുക വെച്ച് മാസാ മാസം നിക്ഷേപിച്ചാൽ ഫണ്ട് മാനേജർ ഓഹരികൾ വാങ്ങുകയും വിൽക്കുകയും ചെയ്തു കൊള്ളും. നമുക്ക് തലവേദന കുറവാണ്.

മുന്നറിയിപ്പ്: മ്യൂച്വൽ ഫണ്ട് നിക്ഷേപങ്ങൾ  മാർക്കറ്റ് റിസ്കുകള്ക്ക് വിധേയമാണ്, സ്കീം സംബന്ധിച്ചുള്ള എല്ലാ രേഖകളും ശ്രദ്ധാപൂർവ്വം വായിക്കുക. ഓഹരി വിപണി നിക്ഷേപങ്ങൾ നഷ്ടസാധ്യത ഉള്ളവ ആണ്. നിക്ഷേപിക്കുന്നതിനു മുൻപ് വിശദമായി പഠിക്കണം. കഴിഞ്ഞ കാല  പ്രകടനം ഭാവി വരുമാനം സൂചിപ്പിക്കുന്നത് അല്ല. ഒരു പുത്തൻ നിക്ഷേപം തെരഞ്ഞെടുക്കുന്നതിന് മുൻപ് നിങ്ങളുടെ നിർദ്ദിഷ്ട നിക്ഷേപ ആവശ്യകതകൾ പരിഗണിക്കുക.

അടുത്ത ലേഖനം: മ്യൂച്വൽ ഫണ്ട് (Mutual Funds)