ഇപ്പോൾ നാട്ടിൽ നിന്നും ഒരുപാട് കുട്ടികൾ വിദേശത്ത് പഠിക്കാൻ പോകുന്നുണ്ടല്ലോ. ലക്ഷങ്ങൾ ചെലവുള്ള ഒരു പരിപാടിയാണ് ഇത്. ചിലരെല്ലാം വീടു പണയം വച്ചും പലിശയ്ക്ക് കടം വാങ്ങിയും എല്ലാമാണ് വിദേശത്ത് പഠിക്കാൻ മക്കളെ അയക്കുന്നത്. അവർ പഠിച്ച് രക്ഷപ്പെടട്ടെ എന്ന് വിചാരിച്ചു കൊണ്ടാണ് പല മാതാപിതാക്കളും പിള്ളേർക്ക് വേണ്ടി ത്യാഗം സഹിക്കുന്നത്.
ഞാൻ നിലവിൽ വിദേശത്ത് താമസിക്കുന്ന ആൾ ആയതു കൊണ്ടും എൻ്റെ ഭാര്യ വിദേശത്ത് ഒരു യൂണിവേഴ്സിറ്റിയിൽ മാസ്റ്റേഴ്സ് ഡിഗ്രി(Masters Degree) എടുത്തതു കൊണ്ടും എൻ്റെ അനിയത്തി വിദേശത്ത് ഒരു കോളേജിൽ ഇപ്പോൾ പഠിക്കുന്നത് കൊണ്ടും ഈ വിഷയത്തെകുറിച്ചു അഭിപ്രായം പറയുവാനുള്ള വിവരം എനിക്കുണ്ടെന്ന് ഞാൻ കരുതുന്നു.
ഈ ലേഖനം വിദേശത്ത് പഠിക്കാൻ പോകുമ്പോൾ എന്തൊക്കെ ശ്രദ്ധിക്കണം എന്നുള്ളതിനെ കുറിച്ചുള്ള എൻ്റെ അഭിപ്രായമാണ്.
എന്തിനാണ് വിദേശത്തേക്ക് പോകുന്നത്?
വിദേശ രാജ്യങ്ങളിൽ ഉള്ള കോളേജുകളിൽ പഠിക്കാൻ നല്ല ചെലവാണ്. ഇന്ത്യയിൽ രണ്ട് ലക്ഷത്തിന് പഠിച്ചിറങ്ങുന്ന കോഴ്സുകൾ വിദേശത്ത് പഠിച്ചിറങ്ങുമ്പോൾ ചിലപ്പോൾ 20 ലക്ഷമാകും. പഠിച്ചതിനു ശേഷം തിരിച്ച് ഇന്ത്യയിലേക്ക് വരുവാൻ ആണെങ്കിൽ ഫുൾ സ്കോളർഷിപ്പിൽ(full scholarship) അല്ലാതെ പോകുന്നത് വൻ മണ്ടത്തരമാണ്. പഠിച്ചതിനു ശേഷം വിദേശത്ത് തന്നെ തുടരാൻ ആണെങ്കിൽ പഠിക്കുന്ന ഡിഗ്രിയുടെ റിട്ടേൺ ഓഫ് ഇൻവെസ്റ്റ്മെന്റ് (Return of Investment) എത്രയാണെന്ന് കണക്കാക്കണം. ഇതിനെക്കുറിച്ച് താഴെ എഴുതുന്നു.
പഠിക്കുന്ന ഡിഗ്രിയുടെ റിട്ടേൺ ഓഫ് ഇൻവെസ്റ്റ്മെൻ്റ്
ചില ഡിഗ്രികൾ പഠിച്ചാൽ ജോലി കിട്ടാനും കിട്ടുന്ന ജോലിക്ക് ഉയർന്ന ശമ്പളം ലഭിക്കുവാനും ഉള്ള സാധ്യത കൂടുതലാണ്. ഉദാഹരണത്തിന് ഇലക്ട്രോണിക്സ്/ഇലക്ട്രിക്കൽ എൻജിനീയറിങ് മാസ്റ്റേഴ്സ് ഡിഗ്രി (Electronics/Electrical Engineering Masters degree) അല്ലെങ്കിൽ നഴ്സിംഗ് ഡിഗ്രി. നഴ്സിംഗ് ഡിഗ്രി എടുത്തതിനു ശേഷം ക്വാളിഫിക്കേഷൻ എക്സാം (qualification exam) പാസായാൽ ഒരുമാതിരി എല്ലാ വിദേശരാജ്യങ്ങളിലും ജോലി കിട്ടാൻ എളുപ്പമായിരിക്കും. ഇതേപോലെ തന്നെ വെസ്റ്റേൺ കൺട്രീസിൽ ഇലക്ട്രോണിക് എൻജിനീയേഴ്സിനെല്ലാം നല്ല ഡിമാൻഡ് ആണ്. ജോലി കിട്ടാൻ കുറച്ച് ബുദ്ധിമുട്ടാണെങ്കിലും ജോലി കിട്ടിയാൽ ശമ്പളം വളരെ കൂടുതലായിരിക്കും. കമ്പ്യൂട്ടർ സയൻസ് എൻജിനീയർമാർക്കും ജോലി കിട്ടാൻ പൊതുവേ എളുപ്പമാണ് ശമ്പളവും ഉണ്ടാകും. ഈ പറഞ്ഞ ജോലികളെല്ലാം മിക്കവാറും പ്രൈവറ്റ് കമ്പനികളിൽ ആയിരിക്കും. ഈ കമ്പനികൾ നമുക്ക് വേണ്ട വിസയും ഇമിഗ്രേഷൻ (immigration paperwork) പേപ്പർ വർക്കും ചെയ്യാനുള്ള സാധ്യതയും കൂടുതലാണ്.
നേഴ്സിങ് ഡിഗ്രി പഠിക്കുവാനും എൻജിനീയറിംഗിൽ മാസ്റ്റേഴ്സ് ഡിഗ്രി (മാസ്റ്റേഴ്സ് ഡിഗ്രികൾക് പൊതുവേ രണ്ടു കൊല്ലം മതി) എടുക്കുവാനും പൊതുവേ മറ്റു നാലുവർഷ കോഴ്സുകളെ വച്ച് ചെലവ് വളരെ കുറവാണ്. കോഴ്സ് കഴിഞ്ഞ് ജോലി കിട്ടുവാനുള്ള സാധ്യത കൂടുതലുമാണ്.
അതേ സമയം ഇംഗ്ലീഷ് ലാംഗ്വേജ് ലിറ്ററേച്ചർ(English language literature) മാസ്റ്റേഴ്സ് എടുത്ത ഒരാൾക്ക് ജോലി സാധ്യതകൾ കുറച്ചു കുറവാണ്. കാരണം സ്കൂളുകളിലോ കോളേജുകളിലോ അധ്യാപകരായിട്ടോ അല്ലെങ്കിൽ ചില കമ്പനികൾ അവരുടെ ക്രിയേറ്റീവ് റൈറ്റിങ്ങിനു(creative writing) അല്ലെങ്കിൽ അവരുടെ ഒഫീഷ്യൽ മെമ്മോസ് (official memos)എഴുതുവാനോ ഒക്കെയാണ് ഈ ഡിഗ്രി ഉള്ളവരെ ജോലിക്ക് എട്ക്കുന്നത്. ഇങ്ങനെയുള്ള കമ്പനികൾ നമുക്ക് വിസയോ അല്ലെങ്കിൽ വേറെ ഇമിഗ്രേഷൻ പേപ്പർ വർക്കോ ചെയ്യുവാനുള്ള സാധ്യത വളരെ കുറവാണ്.
ഇനി നാലുവർഷത്തേക്കുള്ള എൻജിനീയറിങ് ഡിഗ്രി വിദേശത്ത് പോയി ചെയ്യാൻ തീരുമാനിച്ചാൽ നമ്മൾ പഠിക്കുന്ന സ്ഥാപനത്തിലെ ഏറ്റവും മികച്ച വിദ്യാർത്ഥി ആയാൽ മാത്രമേ ജോലി ഉറപ്പു പറയാൻ പറ്റുകയുള്ളൂ. അല്ലെങ്കിൽ എല്ലാം ഭാഗ്യം പോലെ ഇരിക്കും. വിദേശരാജ്യങ്ങളിൽ പ്രത്യേകിച്ച് അമേരിക്ക കാനഡ ജർമ്മനി ഓസ്ട്രേലിയ പോലുള്ള സ്ഥലങ്ങളിൽ മിക്കവാറും എൻജിനീയറിങ് കോഴ്സുകളിൽ ആ രാജ്യത്തെ പൗരന്മാരായ ചെറുപ്പക്കാർ ഒരുപാടുണ്ടാകും. വിദേശത്തു നിന്നുള്ള ഒരാൾക്ക് വർക്ക് വിസയും(work visa) ഇമിഗ്രേഷൻ പേപ്പർ വർക്കും ചെയ്യേണ്ട സമയത്ത് ഈ വിദ്യാർത്ഥികളെ ഇതൊന്നും ചെയ്യാണ്ട് അതേ ജോലിക്ക് വേണ്ടി എടുക്കാം. അപ്പോൾ നമ്മൾ ഒരു ക്ലാസിലെ ഏറ്റവും മികച്ച വിദ്യാർത്ഥി ആയാൽ മാത്രമേ നമ്മൾക്ക് വേണ്ടി ഒരു കമ്പനി ഇതെല്ലാം ചെയ്യാൻ തയ്യാറാവുകയുള്ളൂ. അതേസമയം വിദേശരാജ്യങ്ങളിൽ മാസ്റ്റർ ഡിഗ്രിക്ക് പോകുന്നവർ വളരെ കുറവാണ്. കാരണം പ്രൊഫഷണൽ കോഴ്സുകളിൽ ബാച്ചിലേഴ്സ് ഡിഗ്രിക്ക് (bachelor’s degree) ശേഷം മിക്കവാറും എല്ലാവർക്കും ജോലി കിട്ടും. അപ്പോൾ മാസ്റ്റേഴ്സ് ഡിഗ്രി കഴിഞ്ഞിട്ട് ജോലി കിട്ടുവാൻ മത്സരം കുറവായിരിക്കും. അതേ പോലെ ഇമിഗ്രേഷൻ പേപ്പർ വർക്ക് ചെയ്യുവാനും മാസ്റ്റർ ഡിഗ്രി പലപ്പോഴും സഹായകരമാണ്.
പ്ലസ് ടു കഴിഞ്ഞ് അമേരിക്കയിൽ ഡോക്ടർ ആവാൻ ഒരു കോളേജിൽ കയറിയാൽ ഏകദേശം 7-8 കൊല്ലം കഴിയുമ്പോഴാണ് ഡോക്ടർ ആയി ഉള്ള ലൈസൻസ് കിട്ടുക. ഇന്ത്യയിൽ നിന്ന് നേരെ പ്ലസ് ടു കഴിഞ്ഞ് അമേരിക്കയിൽ വന്ന് ഡോക്ടറാവാൻ ചേർന്നാൽ കോഴ്സ് കഴിയുമ്പോഴേക്കും കോടിക്കണക്കിന് രൂപ കടം വരും. അതേ സമയം എംബിബിഎസ് (MBBS) നാട്ടിൽ നിന്ന് എടുത്തിട്ട് അമേരിക്കയിലെ ക്വാളിഫിക്കേഷൻ എക്സാം (qualification exam) പാസായി എംഡിക്ക്(MD) കയറുകയാണെങ്കിൽ ചിലപ്പോൾ മൂന്നു കൊല്ലത്തിനുള്ളിൽ ലൈസൻസ് കിട്ടും.
ഇവിടെ ശ്രദ്ധിക്കേണ്ട കാര്യം എന്താണെന്ന് വച്ചാൽ അമേരിക്കൻ യൂണിവേഴ്സിറ്റികളിലേക്ക് ട്രാൻസ്ഫർ ചെയ്യാൻ പറ്റുന്ന രീതിയിൽ അംഗീകൃതമായ കോഴ്സുകളെ ഇന്ത്യയിൽ എടുക്കാവൂ എന്നുള്ളതാണ്.
ഇനി മാസ്റ്റേഴ്സ് ഡിഗ്രിക്ക് പകരം പിഎച്ച്ഡി എടുക്കുവാനാണ് വിദേശത്തേക്ക് പോകുന്നതെങ്കിൽ മിക്കവാറും സ്റ്റൈപ്പൻഡ് (stipend) ആയി ഒരു തുക ഇങ്ങോട്ട് കിട്ടും. പൊതുവേ നമ്മുടെ ഫീസും ജീവിതചലവും അതുകൊണ്ട് കഴിഞ്ഞുപോകാം.
പഠിച്ചതിനുശേഷം ജോലി ചെയ്യുവാൻ ഉള്ള വിസ കിട്ടുമോ?
അമേരിക്കയിൽ രണ്ടു കൊല്ലം ദൈർഘ്യമുള്ള STEM (Science Technology Engineering Mathematics) കാറ്റഗറിയിൽ വരുന്ന കോഴ്സുകൾ എടുക്കുകയാണെങ്കിൽ മൂന്നുവർഷത്തേക്കുള്ള വർക്ക് വിസ കിട്ടും. ഇതിന് OPT എന്നാണ് പറയുക. കോഴ്സ് കഴിഞ്ഞു OPT കിട്ടിയാൽ 90 ദിവസത്തിനുള്ളിൽ ജോലി കണ്ടുപിടിക്കണം. ഇല്ലെങ്കിൽ തിരിച്ചു പോകേണ്ടിവരും. ഇനി ജോലി കിട്ടിയാൽ തന്നെ മൂന്നു കൊല്ലത്തിനുള്ളിൽ വേറെ ഏതെങ്കിലും വിസയിലേക്ക് മാറണം. അല്ലെങ്കിൽ മൂന്നു കൊല്ലത്തിനു ശേഷം തിരിച്ചുപോണം. അമേരിക്കയിലെ നിലവിലെ സാഹചര്യത്തിൽ ഈ വിസക്ക് H1B എന്നാണ് പറയുക. H1B വിസ ഒരു ലോട്ടറി ആണ്. വിസ സ്പോൺസർ ചെയ്യുന്ന ഒരു കമ്പനിയെ കണ്ടു പിടിക്കുക എന്നുള്ളത് പ്രയാസമുള്ള കാര്യമാണ്. അതിനുശേഷം മൂന്നു കൊല്ലത്തിനുള്ളിൽ രണ്ട് ചാൻസ് മാത്രമേ കിട്ടുകയുള്ളൂ വിസയ്ക്ക് ആപ്ലിക്കേഷൻ കൊടുക്കാൻ. അതിനുള്ളിൽ കിട്ടിയാൽ അമേരിക്കയിൽ തുടരാം ഇല്ലെങ്കിൽ തിരിച്ചു പോകേണ്ടിവരും. ഈ സാഹചര്യത്തിൽ കോടിക്കണക്കിന് രൂപ മുടക്കി അമേരിക്കയിൽ പഠിക്കാൻ വരുന്നത് വൻ റിസ്കാണ്.
ഇതെ ഡിഗ്രി കാനഡയിലോ ഓസ്ട്രേലിയയിലോ എടുത്താൽ വിസ സ്പോൺസർ ചെയ്യുന്ന ഒരു കമ്പനിയെ കണ്ടു പിടിച്ചാൽ മതി. പിന്നെ അവിടെ വിസ അപ്ലിക്കേഷനിൽ ഒരു ലോട്ടറി സമ്പ്രദായമോ ഭാഗ്യത്തിൻ്റെ കളിയോ ഒന്നുമില്ല. അതുകൊണ്ട് പഠിക്കാൻ സ്വീകരിക്കുന്ന രാജ്യം വളരെ പ്രധാനമാണ്.
എന്നാൽ ഡോക്ടറേറ്റ് ചെയ്യാൻ വളരെ നല്ല ഒരു രാജ്യമാണ് അമേരിക്ക. PhD ചെയ്താൽ EB1 എന്ന ഒരു കാറ്റഗറിയിൽ പെർമനന്റ് റെസിഡൻസി(permanent residency) അല്ലെങ്കിൽ ഗ്രീൻ കാർഡ്(green card) കിട്ടുന്ന ഒരു പ്രോഗ്രാം അമേരിക്കയിൽ ഉണ്ട്. അതുകൊണ്ട് PhD ഉള്ളവർക്ക് ഈ വിസയുടെ ടെൻഷൻ പൊതുവേ ഉണ്ടാവാറില്ല.
പല രാജ്യങ്ങളിലും അവിടെ പഠിച്ചു കഴിഞ്ഞാൽ എത്ര കാലം ജോലി ചെയ്യാം എന്നുള്ളതിന് വളരെ കൃത്യമായ നിയമമുണ്ട്. ഇത് അന്വേഷിച്ചിട്ട് മനസ്സിലാക്കിയിട്ട് മാത്രമേ കോളേജിൽ അഡ്മിഷൻ എടുക്കാവൂ.
ബാച്ചിലർ ഡിഗ്രി പഠിക്കണോ അതോ മാസ്റ്റേഴ്സ് ഡിഗ്രി പഠിക്കണോ?
എൻ്റെ അഭിപ്രായത്തിൽ നഴ്സിംഗ് ആണ് ബാച്ചിലർ ഡിഗ്രി പഠിക്കുവാനായി വിദേശത്ത് പോകുവാൻ മുതൽ ആകുന്ന ഒരേ ഒരു പ്രൊഫഷൻ. എൻജിനീയറിങ് ഡിഗ്രിയും ഫിസിക്സും(physics) കെമിസ്ട്രിയും(chemistry) എല്ലാം മാസ്റ്റേഴ്സ് പഠിക്കുവാനാണ് പോകാൻ നല്ലത്. ആനിമേഷൻ(animation) ക്രിയേറ്റീവ് റൈറ്റിംഗ്(creative writing) എന്നിവയെല്ലാം ആയാലും ഇന്ത്യയിൽ ബാച്ചിലേഴ്സ് ഡിഗ്രി(bachelor’s degree) പഠിച്ചു ഒന്ന് രണ്ട് കൊല്ലത്തെ ജോലി പരിചയത്തിനു ശേഷം വിദേശത്തേക്ക് മാസ്റ്റേഴ്സ് എടുക്കാൻ പോകുന്നതാണ് നല്ലത്. അമേരിക്കയിലേക്ക് വരുവാനുള്ള ഇന്ത്യൻ പൗരന്മാർക്ക് ഏറ്റവും നല്ലത് PhD എടുക്കാൻ വരുന്നതാണ്. മാസ്റ്റേഴ്സ് ഡിഗ്രി എടുക്കുവാൻ വരുന്നതാണെങ്കിൽ നിങ്ങൾ നിങ്ങളുടെ ക്ലാസിലെ മികച്ച 20% ത്തിൽ എത്തുമെന്ന് ഉറപ്പുള്ള വരെ വരാവൂ. അല്ലെങ്കിൽ ജോലി കിട്ടുവാൻ സ്വല്പം ബുദ്ധിമുട്ടാണ്.
ഏതു കോളേജിൽ പോകുന്നു എന്നുള്ളതും വളരെ പ്രധാനമാണ്.
വിദേശത്തുനിന്ന് വരുന്ന വിദ്യാർഥികൾ വളരെ ഉയർന്ന ഫീസ് കൊടുക്കുന്ന കാരണം നാട്ടിലെ പാരലൽ കോളേജ് പോലെ കുറെ തരികിട കോളേജുകളും പാശ്ചാത്യ നാടുകളിൽ ഉണ്ട്. നാട്ടിൽ നിന്ന് ലക്ഷങ്ങൾ കൊടുത്ത് പഠിക്കാൻ വരുമ്പോൾ ഏതു കോളേജിലും അഡ്മിഷൻ കിട്ടിയാൽ പോകും എന്ന് വിചാരിക്കരുത്. നല്ല പേരുള്ള വലിയ യൂണിവേഴ്സിറ്റി ആണോ എന്ന് നോക്കിയിട്ട് മാത്രമേ പഠിക്കാൻ ചേരാൻ പാടുള്ളൂ. നല്ല നഗരങ്ങളിലുള്ള നല്ല യൂണിവേഴ്സിറ്റികളിൽ പഠിച്ചാൽ ജോലി സാധ്യത വളരെ കൂടുതലാണ്. വളരെ ആൾതാമസം കുറഞ്ഞ ഒഴിഞ്ഞ നഗരങ്ങളിലുള്ള ചെറിയ കോളേജുകളിൽ പഠിച്ചാൽ പാർട്ട് ടൈം (part time)ജോലി കിട്ടുവാനും പഠനത്തിനുശേഷം നല്ല ജോലി കിട്ടുവാനും ക്യാമ്പസ് ഇൻറർവ്യൂകളിൽ (campus interview) പങ്കെടുക്കുവാനുള്ള സാഹചര്യവും എല്ലാം കുറവായിരിക്കും. ഇതേ പോലെ തന്നെ യൂണിവേഴ്സിറ്റി ഒരു സുപ്രഭാതത്തിൽ നിർത്തി പോകില്ല എന്നുള്ളതും നമുക്ക് ഉറപ്പാക്കേണ്ട കാര്യമാണ്. പഠിച്ചുകൊണ്ടിരിക്കെ യൂണിവേഴ്സിറ്റി നിർത്തി പോയി കാശും പോയി ഡിഗ്രിയും ഇല്ല എന്നുള്ള അവസ്ഥയിൽ കുറെ വിദ്യാർത്ഥികൾ കുറച്ചു കൊല്ലങ്ങൾക്കു മുമ്പ് അമേരിക്കയിൽ പെട്ടുപോയതാണ്.
പോകുന്ന രാജ്യം വിദേശത്തു നിന്നുള്ള വിദ്യാർഥികൾക്ക് പെർമനന്റ് റെസിഡൻസി(Permanent Residency) കൊടുക്കുവാൻ താല്പര്യമുള്ളതാണോ?
ജപ്പാൻ കാനഡ ഓസ്ട്രേലിയ ജർമ്മനി പോലെയുള്ള രാജ്യങ്ങൾ അവരുടെ നിലവിലെ ജനസംഖ്യ കുറയുന്നത് കാരണം പുറത്തുനിന്നുള്ള ആൾക്കാരെ സ്വീകരിക്കാൻ കുറെ കൂടി തയ്യാറാണ് ഇപ്പോൾ. ഇങ്ങനെയുള്ള രാജ്യങ്ങളിൽ പഠിക്കുവാൻ പോയാൽ അവിടെ സ്ഥിരമായി നിൽക്കുവാനുള്ള പെർമനന്റ് റസിഡൻസ്(permanent residence) കിട്ടുവാനുള്ള സാധ്യത കൂടുതലാണ്.
അതേസമയം അമേരിക്കയ്ക്ക് അങ്ങനെയൊരു പ്രശ്നമില്ല. ഈ രാജ്യത്ത് വന്ന് നല്ലൊരു ജോലി കിട്ടി 10-15 കൊല്ലം ജോലി ചെയ്താലും റെസിഡൻസി കിട്ടണമെന്ന് യാതൊരു നിർബന്ധവുമില്ല. ജോലി പോയാൽ 60 ദിവസത്തിനുള്ളിൽ രാജ്യം വിടേണ്ടി വരും. അതുകൊണ്ട് പഠനത്തിനുശേഷം വിദേശത്ത് തുടരാൻ ഉദ്ദേശിച്ചാണ് പോകുന്നതെങ്കിൽ പോകുന്ന രാജ്യത്തെ സിറ്റിസൺ(citizen) ആവാൻ എന്താണ് വഴി എന്നുള്ളത് മുന്നേ അന്വേഷിക്കണം. ഈ വിവരങ്ങൾ എല്ലാം രാജ്യത്തിൻറെ ഇമിഗ്രേഷൻ വെബ്സൈറ്റുകളിൽ(immigration website) കൃത്യമായി പറഞ്ഞിട്ടുണ്ട്. പിന്നെ മലയാളി ഇല്ലാത്ത നാടിപ്പോൾ ഇല്ലാത്ത കാരണം യൂട്യൂബിൽ സെർച്ച് (YouTube search) ചെയ്താലും വിവരം കിട്ടും. യൂട്യൂബിൽ നിന്നുള്ള വിവരം ഒഫീഷ്യൽ വെബ്സൈറ്റുമായി ഒത്തു നോക്കാൻ മറന്നു പോകരുത്. ഒഫീഷ്യൽ വെബ്സൈറ്റുകൾ ഇംഗ്ലീഷിൽ ആയിരിക്കും. അതു വായിച്ചു മനസ്സിലാക്കുവാൻ സാധിക്കുന്നില്ലെങ്കിൽ അതിനുള്ള ഇംഗ്ലീഷ് എങ്കിലും ആദ്യം ശരിയാക്കിയിട്ടേ വിദേശത്ത് പോകാൻ ശ്രമിക്കാവൂ. ഇംഗ്ലീഷ് മര്യാദയ്ക്ക് പഠിച്ചെടുക്കുവാൻ ഒരു രണ്ടു മാസത്തെ ശ്രമവും കൂടിപ്പോയാൽ ഒരു അമ്പതിനായിരം രൂപയുടെ ഒരു ക്ലാസും മതിയാകും.
എന്ത് കോഴ്സ് ആയാലും കുഴപ്പമില്ല അവിടെ എത്തിയാൽ ഞാൻ എന്ത് പണിയും ചെയ്തു ജീവിക്കാം എന്ന് വിചാരിക്കരുത്. മിക്ക രാജ്യങ്ങളിലും പഠിക്കുന്ന കോഴ്സിനോട്(course) ബന്ധമുള്ള ജോലി മാത്രമേ എടുക്കാൻ സമ്മതിക്കുകയുള്ളൂ. അതു പോലെ ഒരുതവണ നിയമം തെറ്റിച്ച് വിസയുടെ കാലാവധി കഴിഞ്ഞു അല്ലെങ്കിൽ വിസ ഇല്ലാതെ ജോലി ചെയ്തു പിടിച്ചു കഴിഞ്ഞാൽ പിന്നെ ആ രാജ്യത്ത് നിന്ന് പെർമനന്റ് റസിഡൻസ് കിട്ടുവാനുള്ള സാധ്യത വളരെ കുറവാണ്. നമ്മുടെ നാട്ടിലെ പോലെ കാശുകൊടുത്ത് പേപ്പർ മുക്കാൻ പറ്റില്ല.
പഠിക്കാൻ പോകുന്ന വിദ്യാർത്ഥി പഠിക്കാൻ മിടുക്കിയാണോ?
നാട്ടിൽ പരീക്ഷയ്ക്ക് കഷ്ടിച്ച് പാസാക്കുന്ന വിദ്യാർത്ഥിയെ വിദേശത്ത് പഠിക്കാൻ വിട്ട് അവൻ അല്ലെങ്കിൽ അവൾ രക്ഷപ്പെടുമെന്ന് പ്രതീക്ഷിക്കുന്നതും മണ്ടത്തരമാണ്. നന്നായി പഠിക്കും എന്നുണ്ടെങ്കിൽ മാത്രമേ പഠിക്കാനായി വിദേശത്ത് പോകേണ്ട കാര്യമുള്ളൂ. നേരത്തെ പറഞ്ഞ പോലെ ജപ്പാൻ കാനഡ പോലെയുള്ള രാജ്യങ്ങളിൽ ജനസംഖ്യ കുറയുന്നത് കാരണം പുറത്തുനിന്ന് ആൾക്കാരെ സ്വീകരിക്കാൻ അവർ തയ്യാറാണ്. ഇതിന് അവിടുത്തെ കോളേജിൽ പഠിക്കണം എന്നു നിർബന്ധമില്ല. ആ രാജ്യങ്ങളുടെ ഇമിഗ്രേഷൻ പദ്ധതികളിൽ പുറത്തുനിന്നുള്ള രാജ്യങ്ങളിൽ നിന്ന് ആൾക്കാരെ സ്വീകരിക്കുവാനുള്ള വഴികൾ അവർ തുറന്നു വച്ചിട്ടുണ്ടാകും. ചിലപ്പോൾ ഒരു സോഫ്റ്റ്‌വെയർ എൻജിനീയറിനെകാൾ (Software Engineer) ഹെവി ട്രക്ക് (heavy truck) അഥവാ ലോറി ഓടിക്കുന്ന ഡ്രൈവർമാർക്ക് ആയിരിക്കും ചില രാജ്യങ്ങളിലേക്ക് പോകുവാനുള്ള അവസരങ്ങൾ കൂടുതൽ. വിദേശത്ത് പോവാനുള്ള ആഗ്രഹത്തിനുവേണ്ടി ലക്ഷങ്ങളുടെ കടം എടുക്കുന്നതിന് പകരം ജനസംഖ്യ കുറവു കാരണം വിദേശികളെ ആകർഷിക്കുവാനായി താല്പര്യമുള്ള രാജ്യങ്ങൾ ഏതുതരം കഴിവുകൾക്കാണ് അല്ലെങ്കിൽ ഏത് ജോലിക്കാർക്കാണ് മുൻഗണന നൽകുന്നത് എന്ന് കണ്ടുപിടിച്ച് ആ ജോലി പഠിക്കുവാൻ ആയിരിക്കും ചെലവ് കുറവ്.
നമ്മുടെ കഴിവ് ആവശ്യമുള്ള രാജ്യം ഏതാണെന്ന് നോക്കി അങ്ങോട്ട് പോകാൻ ആവശ്യമുള്ളത് ചെയ്യുന്നതാണ് കണ്ണുമടച്ച് വിദേശത്ത് യൂണിവേഴ്സിറ്റിയിൽ ചേരുന്നതിനേക്കാൾ നല്ലത്.